Maxfiylik siyosati

Ushbu Siyosat shaxsga doir ma’lumotlarga ishlov berish tartibini, shuningdek ABACUSga murojaat qilish uchun foydalaniladigan sayt, elektron pochta, messenjerlar, telefon aloqasi va boshqa kommunikatsiya kanallari orqali uzatiladigan ishbilarmonlik, tijorat, korporativ, moliyaviy, soliq, shartnomaviy va boshqa axborotning maxfiyligini ta’minlash tartibini belgilaydi.

Sayt asosan yuridik shaxslar, yakka tartibdagi tadbirkorlar, biznes vakillari, investorlar, fondlar, moliya tashkilotlari, startaplar, xorijiy kompaniyalar, ularning vakillari va ish muomalasining boshqa professional ishtirokchilari bilan o‘zaro hamkorlik qilish uchun mo‘ljallangan.

Shu bilan birga, bunday o‘zaro hamkorlik jarayonida ABACUS yuridik shaxslar nomidan yoki ularning manfaatlarini ko‘zlab harakat qiluvchi jismoniy shaxslarning, shu jumladan direktorlar, ta’sischilar, xodimlar, vakillar, maslahatchilar, aloqa uchun mas’ul shaxslar, benefitsiarlar, kontragentlar hamda murojaat, muzokaralar, shartnoma tuzish yoki uni bajarish, yuridik, maslahat va boshqa professional xizmatlar ko‘rsatish munosabati bilan o‘zlari haqidagi ma’lumotlar ABACUSga uzatiladigan boshqa shaxslarning shaxsga doir ma’lumotlarini olishi va ularga ishlov berishi mumkin.

Umumiy qoidalar

1. Ushbu Siyosatda quyidagi asosiy tushunchalar qo‘llaniladi:
   • Operator — Foydalanuvchilarning Sayt va boshqa kommunikatsiya kanallari orqali kelib tushadigan shaxsga doir ma’lumotlarini yig‘ishni va ularga birlamchi ishlov berishni amalga oshiruvchi, shuningdek ushbu Siyosatda nazarda tutilgan maqsadlar va shartlar doirasida mazkur ma’lumotlarning ABACUS brendi ostida faoliyat yurituvchi boshqa shaxslarga uzatilishini hamda ushbu shaxslar tomonidan ularga ishlov berilishini tashkil etuvchi sayt ma’muri.
   • ABACUS — qonunchilikda belgilangan tartibda huquqiy muhofazaga olingan xizmat ko‘rsatish belgisi, shuningdek ushbu Siyosatda mazkur brend ostida faoliyat yurituvchi shaxslarni, shu jumladan yuridik, maslahat, korporativ, soliq, investitsiya, komplayens va boshqa professional xizmatlar ko‘rsatuvchi yuridik shaxslar, advokatlik tuzilmalari, yuridik maslahatchilar tashkilotlari, maslahatchilar, hamkorlar va mutaxassislarni ifodalash uchun qo‘llaniladigan shartli nom.
   • Sayt — abacus.law manzilida joylashgan veb-sayt.
   • Foydalanuvchi — Saytga tashrif buyuruvchi, Sayt yoki boshqa aloqa kanallari orqali murojaat yuboruvchi, shu jumladan yuridik shaxs, yakka tartibdagi tadbirkor, tashkilot, mijoz, potensial mijoz, hamkor yoki ish muomalasining boshqa ishtirokchisi nomidan yoki uning manfaatlarini ko‘zlab harakat qiluvchi jismoniy shaxs.
   • Shaxsga doir ma’lumotlar — muayyan jismoniy shaxsga taalluqli bo‘lgan yoki uni identifikatsiya qilish imkonini beradigan har qanday axborot.
   • Shaxsga doir ma’lumotlarga ishlov berish — shaxsga doir ma’lumotlarni yig‘ish, tizimlashtirish, saqlash, o‘zgartirish, to‘ldirish, ulardan foydalanish, ularni berish, tarqatish, uzatish, egasizlantirish va yo‘q qilish bo‘yicha bir harakatni yoki harakatlar majmuini amalga oshirish.
   • Mijoz / potensial mijoz — manfaatlarini ko‘zlab Foydalanuvchi murojaat yuboradigan, hujjatlarni uzatadigan, ABACUSdan taklif, maslahat yoki boshqa professional xizmatlarni so‘raydigan yuridik shaxs, yakka tartibdagi tadbirkor, jismoniy shaxs, investor, fond, moliya tashkiloti, startap, xorijiy kompaniya yoki boshqa shaxs.
   • Ishbilarmonlik axboroti — murojaat, muzokaralar, taklif tayyorlash, shartnoma tuzish yoki uni bajarish munosabati bilan ABACUSga uzatiladigan har qanday axborot, hujjatlar va ma’lumotlar, shu jumladan kompaniya faoliyati, korporativ tuzilma, ishtirokchilar, benefitsiarlar, bitimlar, shartnomalar, moliyalashtirish, investitsiyalar, soliqlar, sud nizolari va talabnoma tartibidagi nizolar, loyihalar, mijozlar, kontragentlar, tijorat shartlari, moliyaviy ko‘rsatkichlar, ichki hujjatlar hamda mijoz yoki potensial mijoz faoliyatining boshqa masalalari to‘g‘risidagi ma’lumotlar.
2. Shaxsga doir ma’lumotlarga ishlov berish O‘zbekiston Respublikasi qonunchiligiga, shu jumladan O‘zbekiston Respublikasining «Shaxsga doir ma’lumotlar to‘g‘risida»gi Qonuniga, O‘zbekiston Respublikasining «Axborotlashtirish to‘g‘risida»gi Qonuniga, O‘zbekiston Respublikasining «Tijorat siri to‘g‘risida»gi Qonuniga, shuningdek boshqa qonunchilik hujjatlariga muvofiq amalga oshiriladi.
3. Saytdan foydalanib, qayta aloqa shakli, elektron pochta, telefon, messenjerlar yoki boshqa kommunikatsiya kanallari orqali murojaat yuborib, Foydalanuvchi ushbu Siyosat bilan tanishib chiqqanligini tasdiqlaydi va o‘zining shaxsga doir ma’lumotlariga ushbu Siyosatda nazarda tutilgan tartibda va shartlarda ishlov berilishiga rozilik beradi.
4. Agar Foydalanuvchi ushbu Siyosat shartlariga rozi bo‘lmasa, u Sayt va boshqa aloqa kanallari orqali shaxsga doir ma’lumotlarni yuborishdan tiyilishi lozim.

Sayt ma’muri va ABACUS to‘g‘risida ma’lumotlar

1. Quyidagi shaxs Saytning asosiy ma’muri hisoblanadi va Sayt orqali murojaatlar qabul qilinishini ta’minlaydi:
   • «ABACUS» MChJ
     Manzil: O‘zbekiston Respublikasi, Toshkent shahri, Mirobod tumani, Chimkent ko‘chasi, 15/26
     Telefon: +998 97 733 30 40
     Elektron pochta: info@abacus.law
     Sayt: abacus.law
2. Ushbu Siyosat maqsadlarida ABACUS brendi ostida faoliyat yurituvchi shaxslar jumlasiga ABACUS brendi ostida xizmatlar ko‘rsatuvchi boshqa yuridik shaxslar, advokatlik tuzilmalari, yuridik maslahatchilar tashkilotlari, maslahatchilar, hamkorlar va mutaxassislar kiradi.
3. Foydalanuvchining shaxsga doir ma’lumotlari ko‘rsatilgan shaxslarga faqat murojaatni ko‘rib chiqish, manfaatlar to‘qnashuvini tekshirish, taklif tayyorlash, shartnoma tuzish yoki uni bajarish, xizmatlar ko‘rsatish, ichki ma’muriy boshqaruv, xizmatlar sifatini ta’minlash va qonunchilik talablariga rioya etish uchun zarur bo‘lgan hajmda uzatilishi mumkin.
4. Shaxsga doir ma’lumotlarning ABACUS brendi ostida faoliyat yurituvchi shaxslarga uzatilishi ularning erkin tarqatilishini anglatmaydi. Foydalanuvchi yoki mijozning shaxsga doir ma’lumotlariga va maxfiy axborotiga kirish huquqini oladigan barcha shaxslar maxfiylik rejimiga rioya etishi va bunday ma’lumotlardan faqat ushbu Siyosatda nazarda tutilgan maqsadlarda foydalanishi shart.
5. Agar Foydalanuvchining shaxsga doir ma’lumotlari uzatilgan muayyan shaxs to‘g‘risidagi qo‘shimcha axborot qonunchilikka muvofiq taqdim etilishi lozim bo‘lsa va boshqa shaxslarning huquqlari hamda qonuniy manfaatlarini buzmasa, Operator Foydalanuvchining so‘roviga ko‘ra bunday axborotni taqdim etishi mumkin.

ABACUS qanday ma’lumotlar va axborotni olishi mumkin

1. Saytning ishlashi va Foydalanuvchilar bilan muloqot doirasida ABACUS quyidagi ma’lumotlar va axborotni olishi hamda ularga ishlov berishi mumkin:
   • mijozlar va potensial mijozlar vakillarining shaxsga doir ma’lumotlari;
   • qayta aloqa uchun zarur bo‘lgan aloqa ma’lumotlari;
   • manfaatlarini ko‘zlab murojaat yuborilayotgan kompaniya, tashkilot yoki loyiha to‘g‘risidagi ma’lumotlar;
   • ishbilarmonlik, tijorat, korporativ, moliyaviy, soliq, shartnomaviy va boshqa maxfiy axborot;
   • Saytdan foydalanishda avtomatik tarzda uzatiladigan texnik ma’lumotlar;
   • cookie-fayllar va shunga o‘xshash texnologiyalar yordamida olinadigan ma’lumotlar.
2. ABACUS ishlov berishi mumkin bo‘lgan shaxsga doir ma’lumotlar jumlasiga quyidagilar kiradi:
   • familiyasi, ismi, otasining ismi;
   • telefon raqami;
   • elektron pochta manzili;
   • lavozimi;
   • ish joyi yoki vakillik qilinayotgan tashkilotning nomi;
   • vakilning vakolatlari to‘g‘risidagi ma’lumotlar;
   • jismoniy shaxsni identifikatsiya qilish imkonini beradigan murojaat mazmuni;
   • Sayt yoki boshqa aloqa kanallari orqali ixtiyoriy ravishda uzatilgan jismoniy shaxslar to‘g‘risidagi boshqa ma’lumotlar.
3. ABACUS olishi mumkin bo‘lgan ishbilarmonlik axboroti va maxfiy axborot jumlasiga quyidagilar kiradi:
   • mijoz yoki potensial mijozning faoliyati to‘g‘risidagi ma’lumotlar;
   • korporativ hujjatlar;
   • shartnomalar, shartnoma loyihalari, kelishuvlar, yozishmalar;
   • bitimlar, muzokaralar, investitsiyalar, moliyalashtirish to‘g‘risidagi ma’lumotlar;
   • soliq, buxgalteriya, moliyaviy va boshqaruv axboroti;
   • sud nizolari, talabnoma tartibidagi nizolar, arbitraj nizolari va boshqa nizolar to‘g‘risidagi ma’lumotlar;
   • mijozlar, kontragentlar, hamkorlar va loyihalar to‘g‘risidagi axborot;
   • tijorat shartlari, tariflar, hisob-kitoblar, biznes-modellar, ichki hujjatlar;
   • murojaat yoki xizmatlar ko‘rsatish munosabati bilan ABACUSga uzatilgan boshqa axborot.
4. Operator Sayt orqali shaxsga doir maxsus ma’lumotlarni (irqiy yoki milliy kelib chiqishi, siyosiy qarashlari, diniy yoki boshqa e’tiqodlari, sog‘lig‘ining holati, shaxsiy hayoti to‘g‘risidagi ma’lumotlarni), shuningdek biometrik va genetik ma’lumotlarni so‘ramaydi.
5. Agar Foydalanuvchi bunday ma’lumotlarni murojaatda, xabarda yoki ilova qilingan hujjatlarda mustaqil ravishda ko‘rsatsa, Operator ularga faqat murojaatni ko‘rib chiqish, huquqiy masalani dastlabki baholash, shartnomani bajarish yoki qonunchilik talablariga rioya etish uchun zarur bo‘lgan doirada ishlov beradi.
6. Operator voyaga yetmaganlarning shaxsga doir ma’lumotlarini ataylab yig‘ishni amalga oshirmaydi. Agar bunday ma’lumotlar Operatorga qonuniy vakilning roziligisiz yuborilgan bo‘lsa, qonuniy vakil Operatorga ularni o‘chirish talabi bilan murojaat qilishga haqli.

Ma’lumotlar va axborotga ishlov berish maqsadlari

1. ABACUS shaxsga doir ma’lumotlarga va ishbilarmonlik axborotiga quyidagi maqsadlarda ishlov beradi:
   • biznes vakillari, tashkilotlar va boshqa mijozlardan kelib tushgan murojaatlarni ko‘rib chiqish;
   • aloqa uchun mas’ul shaxsni identifikatsiya qilish va qayta aloqa;
   • so‘rov, loyiha, bitim, nizo yoki boshqa huquqiy vaziyatning mohiyatini tushunish;
   • xizmatlar ko‘rsatish imkoniyatini dastlabki baholash;
   • manfaatlar to‘qnashuvini tekshirish;
   • tijorat taklifi, shartnoma, huquqiy xulosa, memorandum, hujjat loyihasi yoki boshqa huquqiy pozitsiyani tayyorlash;
   • mijoz bilan shartnoma tuzish va uni bajarish;
   • yuridik, maslahat, korporativ, soliq, investitsiya, komplayens va boshqa professional xizmatlar ko‘rsatish;
   • topshiriq doirasida mijoz vakillari, kontragentlar, maslahatchilar, davlat organlari, sudlar va boshqa shaxslar bilan muloqot olib borish;
   • mijozga oid axborot va ishbilarmonlik axborotining maxfiyligini ta’minlash;
   • murojaatlar, mijozlar, loyihalar va topshiriqlarning ichki hisobini yuritish;
   • Saytni ma’muriy boshqarish va uning ishini yaxshilash;
   • axborot xavfsizligini ta’minlash;
   • qonunchilik talablarini bajarish;
   • ABACUS, mijoz yoki uchinchi shaxslarning huquqlari va qonuniy manfaatlarini himoya qilish.
2. Operator shaxsga doir ma’lumotlarga ularni yig‘ishda bildirilgan maqsadlarga mos kelmaydigan maqsadlarda ishlov bermaydi.
3. Shaxsga doir ma’lumotlarga ishlov berish maqsadlari o‘zgargan taqdirda, agar qonunchilikda Foydalanuvchining roziligi talab etilsa, Operator bunday rozilikni oladi.

Shaxsga doir ma’lumotlarga ishlov berishning huquqiy asoslari

1. Operator shaxsga doir ma’lumotlarga quyidagi asoslardan biri yoki bir nechtasi mavjud bo‘lganda ishlov beradi:
   • Foydalanuvchining shaxsga doir ma’lumotlarga ishlov berishga roziligi;
   • Foydalanuvchining murojaatini ko‘rib chiqish uchun ma’lumotlarga ishlov berish zarurati;
   • shartnoma tuzilgunga qadar Foydalanuvchining so‘roviga binoan choralar ko‘rish zarurati;
   • Foydalanuvchi yoki u vakillik qilayotgan shaxs bilan shartnoma tuzish va uni bajarish zarurati;
   • qonunchilikda nazarda tutilgan majburiyatlarni bajarish zarurati;
   • Operator, Foydalanuvchi, mijoz yoki uchinchi shaxslarning huquqlari va qonuniy manfaatlarini himoya qilish zarurati, bunda shaxsga doir ma’lumotlar subyektining huquqlari va qonuniy manfaatlari buzilmasligi sharti bilan;
   • hamma foydalanishi mumkin bo‘lgan manbalardan olingan ma’lumotlarga ishlov berish;
   • egasizlantirilgan ma’lumotlarga statistik, tahliliy va tadqiqot maqsadlarida ishlov berish.
2. Foydalanuvchining roziligi qayta aloqa shaklini yuborish, elektron xat jo‘natish, ma’lumotlarni telefon orqali, messenjerda uzatish, shartnomani imzolash, Saytdagi tegishli maydonga belgi qo‘yish yoxud Foydalanuvchining irodasini tasdiqlovchi boshqa harakatlarni amalga oshirish yo‘li bilan ifodalanishi mumkin.

Shaxsga doir ma’lumotlarga ishlov berish tartibi

1. Shaxsga doir ma’lumotlarga ishlov berish qonuniylik, insoflilik, ishlov berishning maqsadliligi, ma’lumotlarning yetarliligi, aniqlik, maxfiylik va himoya qilinganlik prinsiplariga rioya etilgan holda amalga oshiriladi.
2. Operator faqat ishlov berishning bildirilgan maqsadlariga erishish uchun zarur va yetarli bo‘lgan shaxsga doir ma’lumotlarga ishlov beradi.
3. Operator bir-biriga mos kelmaydigan maqsadlarda ishlov beriladigan shaxsga doir ma’lumotlar bazalarini birlashtirmaydi.
4. Shaxsga doir ma’lumotlar Foydalanuvchini identifikatsiya qilish imkonini beradigan shaklda ishlov berish maqsadlari, shartnomaviy munosabatlar yoki qonunchilik talablari taqozo etadigan muddatdan ortiq saqlanmaydi.
5. Shaxsga doir ma’lumotlarga kirish huquqi faqat o‘z vazifalari yoki topshiriqlarini bajarish uchun bunday huquq zarur bo‘lgan xodimlar, hamkorlar, maslahatchilar, advokatlar, IT-pudratchilar va boshqa vakolatli shaxslarga beriladi.
6. Shaxsga doir ma’lumotlarga kirish huquqini olgan shaxslar maxfiylik rejimiga rioya etishi hamda ularni qonunga xilof ravishda oshkor etish, ulardan foydalanish, ulardan nusxa ko‘chirish, ularni o‘zgartirish, tarqatish yoki uzatishga yo‘l qo‘ymasligi shart.

Ishbilarmonlik axboroti va mijozga oid axborotning maxfiyligi

1. ABACUS mijozlar, potensial mijozlar va ularning vakillari tomonidan uzatiladigan hujjatlar, ma’lumotlar va materiallarda ishbilarmonlik, tijorat, korporativ, moliyaviy, soliq, shartnomaviy, investitsiyaviy va boshqa maxfiy axborot bo‘lishi mumkinligidan kelib chiqadi.
2. Bunday axborot, unda jismoniy shaxslarning shaxsga doir ma’lumotlari bor-yo‘qligidan qat’i nazar, ABACUS tomonidan maxfiy deb hisoblanadi.
3. ABACUS ishbilarmonlik axborotini va mijozga oid axborotni mijozning roziligisiz yoki boshqa qonuniy asossiz uchinchi shaxslarga oshkor etmaydi, oshkor etish murojaatni ko‘rib chiqish, manfaatlar to‘qnashuvini tekshirish, taklif tayyorlash, xizmatlar ko‘rsatish, mutaxassislarni jalb qilish, shartnomani bajarish, ABACUS yoki mijozning huquqlari va qonuniy manfaatlarini himoya qilish yoxud qonunchilik talablarini bajarish uchun zarur bo‘lgan hollar bundan mustasno.
4. Ishbilarmonlik axboroti va mijozga oid axborotga kirish huquqi faqat murojaatni ko‘rib chiqish, taklif tayyorlash, xizmatlar ko‘rsatish, ichki ma’muriy boshqaruv, sifat nazorati, manfaatlar to‘qnashuvini tekshirish yoki qonunchilik talablarini bajarish uchun bunday huquq zarur bo‘lgan shaxslarga beriladi.
5. Axborotning ABACUS brendi ostida faoliyat yurituvchi yuridik shaxslar, advokatlik tuzilmalari, yuridik maslahatchilar tashkilotlari, maslahatchilar, hamkorlar va mutaxassislarga uzatilishi axborotni ommaviy oshkor etish hisoblanmaydi hamda maxfiylik rejimiga rioya etilishi sharti bilan faqat ushbu Siyosatda nazarda tutilgan maqsadlar doirasida yo‘l qo‘yiladi.
6. Agar uzatilgan axborot tijorat siriga, qonun bilan qo‘riqlanadigan boshqa sirga yoxud mijoz yoki potensial mijozning maxfiy axborotiga taalluqli bo‘lsa yoki taalluqli bo‘lishi mumkin bo‘lsa, ABACUS maxsus belgi, grif yoki alohida bildirishnoma mavjudligidan qat’i nazar, bunday axborotning maxfiy ekanligi uning xususiyatidan yoki uzatilish holatlaridan kelib chiqqan taqdirda, uni himoya qilish bo‘yicha oqilona choralar ko‘radi.
7. ABACUS topshiriqni qabul qilishdan oldin manfaatlar to‘qnashuvi yuzasidan tekshiruv o‘tkazishga haqli. Manfaatlar to‘qnashuvi aniqlangan taqdirda ABACUS topshiriqni qabul qilishdan bosh tortishga yoki o‘zaro hamkorlikning yo‘l qo‘yiladigan boshqa tartibini taklif qilishga haqli.

Shaxsga doir ma’lumotlar va ishbilarmonlik axborotini uchinchi shaxslarga uzatish

1. Operator shaxsga doir ma’lumotlarni va ishbilarmonlik axborotini uchinchi shaxslarga faqat qonuniy asos mavjud bo‘lganda va ushbu Siyosatda nazarda tutilgan maqsadlarga erishish uchun zarur bo‘lgan doirada uzatishi mumkin.
2. Shaxsga doir ma’lumotlar va ishbilarmonlik axboroti quyidagi toifadagi shaxslarga uzatilishi mumkin:
   • Operatorning xodimlari, maslahatchilari va hamkorlariga;
   • ABACUS brendi ostida faoliyat yurituvchi boshqa yuridik shaxslar, advokatlik tuzilmalari, yuridik maslahatchilar tashkilotlari, maslahatchilar va mutaxassislarga;
   • advokatlar, soliq maslahatchilari, auditorlar, buxgalterlar, tarjimonlar, IT-mutaxassislar va jalb qilingan boshqa mutaxassislarga;
   • xosting, texnik qo‘llab-quvvatlash, saytni ma’muriy boshqarish, elektron pochta, CRM-tizimlar, analitika servislari, hujjat aylanishi va kommunikatsiyalar bo‘yicha xizmat ko‘rsatuvchilarga;
   • davlat organlari, sudlar, huquqni muhofaza qiluvchi organlar va boshqa vakolatli shaxslarga — qonunchilikda nazarda tutilgan hollarda va tartibda;
   • boshqa shaxslarga — Foydalanuvchi yoki mijozning roziligi yoxud boshqa qonuniy asos mavjud bo‘lganda.
3. Operator Foydalanuvchilarning shaxsga doir ma’lumotlarini sotmaydi va Foydalanuvchining roziligisiz ularni uchinchi shaxslarga ular tomonidan mustaqil ravishda marketing maqsadlarida foydalanilishi uchun uzatmaydi.
4. Shaxsga doir ma’lumotlar va ishbilarmonlik axboroti uchinchi shaxslarga uzatilganda Operator ularning maxfiyligi va himoyasini ta’minlash uchun oqilona choralar ko‘radi.

Shaxsga doir ma’lumotlarni transchegaraviy uzatish

1. Operator ma’lumotlarga O‘zbekiston Respublikasidan tashqarida ishlov berilishini yoki ularning saqlanishini nazarda tutishi mumkin bo‘lgan elektron pochta, xosting, analitika, CRM, bulutli saqlash, kommunikatsiya servislari va boshqa texnologik yechimlardan foydalanishi mumkin.
2. Shaxsga doir ma’lumotlarni transchegaraviy uzatish faqat huquqiy asos, shu jumladan Foydalanuvchining roziligi, shartnomani bajarish zarurati, Foydalanuvchining murojaatini ko‘rib chiqish zarurati, qonunchilik talablarini bajarish yoxud qonunchilikda nazarda tutilgan boshqa asoslar mavjud bo‘lganda amalga oshiriladi.
3. O‘zbekiston Respublikasi qonunchiligida shaxsga doir ma’lumotlarning ayrim toifalarini O‘zbekiston Respublikasi hududida majburiy saqlash belgilangan hollarda Operator bunday talablarga rioya etilishini ta’minlaydi.
4. Agar shaxsga doir ma’lumotlarni transchegaraviy uzatish shaxsga doir ma’lumotlar subyektlarining huquqlarini adekvat himoya qilishni ta’minlamaydigan davlatga amalga oshirilsa, bunday uzatishga Foydalanuvchining roziligi yoxud qonunchilikda nazarda tutilgan boshqa asoslar mavjud bo‘lganda yo‘l qo‘yiladi.

Shaxsga doir ma’lumotlarni saqlash va yo‘q qilish, ishbilarmonlik axborotini saqlash

1. Shaxsga doir ma’lumotlar ishlov berish maqsadlariga erishilgunga, rozilikning amal qilish muddati tugagunga, shartnomaviy munosabatlar yakunlangunga, hujjatlarni saqlash muddatlari tugagunga qadar saqlanadi. Agar ularni saqlash Operator, mijoz yoki uchinchi shaxslarning huquqlari va qonuniy manfaatlarini himoya qilish uchun zarur bo‘lsa, ular bunday himoya uchun zarur bo‘lgan muddat davomida saqlanadi.
2. Sayt, elektron pochta yoki boshqa aloqa kanallari orqali yuborilgan murojaatlar murojaatni ko‘rib chiqish, keyingi muloqot, manfaatlar to‘qnashuvini tekshirish, murojaat qilinganlik faktini tasdiqlash, Operatorning huquqlarini himoya qilish va qonunchilik talablarini bajarish uchun zarur bo‘lgan muddat davomida saqlanishi mumkin.
3. Axborot va tahliliy materiallarni yuborib turish uchun ishlov beriladigan ma’lumotlar Foydalanuvchining roziligi chaqirib olingunga yoki bunday materiallarni yuborish to‘xtatilgunga qadar saqlanadi.
4. Texnik ma’lumotlar va cookie-fayllar ma’lumotlari Saytning ishlashini ta’minlash, analitika, xavfsizlik va qonunchilik talablarini bajarish uchun zarur bo‘lgan muddatlar davomida saqlanadi.
5. Agar keyingi saqlash qonunchilikka ko‘ra yoki Operator, mijoz yoki uchinchi shaxslarning huquqlari va qonuniy manfaatlarini himoya qilish uchun talab etilmasa, shaxsga doir ma’lumotlar ishlov berish maqsadlariga erishilganda, rozilik chaqirib olinganda, ishlov berish muddati tugaganda, qonunga xilof ishlov berish aniqlanganda yoxud sudning tegishli qarori qonuniy kuchga kirganda yo‘q qilinishi yoki egasizlantirilishi lozim.
6. Mijozlar yoki potensial mijozlarning ishbilarmonlik axboroti, hujjatlari va materiallari murojaatni ko‘rib chiqish, taklif tayyorlash, xizmatlar ko‘rsatish, shartnomani bajarish, manfaatlar to‘qnashuvini tekshirish, qonunchilik talablariga rioya etish hamda ABACUS, mijoz yoki uchinchi shaxslarning huquqlari va qonuniy manfaatlarini himoya qilish uchun zarur bo‘lgan muddat davomida saqlanadi.

Shaxsga doir ma’lumotlarni himoya qilish

1. Operator shaxsga doir ma’lumotlarni va ishbilarmonlik axborotini g‘ayriqonuniy yoki tasodifiy tarzda kirish, yo‘q qilish, o‘zgartirish, to‘sib qo‘yish, nusxa ko‘chirish, taqdim etish, tarqatish, yo‘qotish hamda boshqa g‘ayriqonuniy harakatlardan himoya qilish uchun zarur huquqiy, tashkiliy va texnik choralarni ko‘radi.
2. Bunday choralar jumlasiga quyidagilar kirishi mumkin:
   • shaxsga doir ma’lumotlarga kirishni cheklash;
   • parollar va kirishni nazorat qilishning boshqa vositalaridan foydalanish;
   • axborot tizimlari foydalanuvchilarining huquqlarini chegaralash;
   • qo‘llash mumkin bo‘lgan hollarda himoyalangan aloqa kanallaridan foydalanish;
   • ma’lumotlarni zaxira nusxalash va tiklash;
   • shaxsga doir ma’lumotlarga kirish huquqiga ega bo‘lgan shaxslarning harakatlarini nazorat qilish;
   • xodimlar va jalb qilingan shaxslar bilan maxfiylik to‘g‘risidagi shartnomaviy majburiyatlar;
   • manfaatlar to‘qnashuvini tekshirish va mijozlarga oid materiallarga kirishni cheklash;
   • ishlov berilayotgan ma’lumotlarning xususiyati va hajmiga mos keladigan boshqa choralar.
3. Ko‘rilayotgan choralarga qaramay, Foydalanuvchi Internet orqali axborot uzatish mutlaqo xavfsiz bo‘la olmasligini tushunadi. Foydalanuvchi maxfiy axborotni ochiq aloqa kanallari orqali yuborish xatarlarini mustaqil ravishda baholaydi.
4. Agar Foydalanuvchi yuqori darajada maxfiy bo‘lgan hujjatlar yoki ma’lumotlarni yuborishni mo‘ljallasa, u bunday materiallarni uzatishning himoyalangan usulini oldindan kelishib olishga haqli.

Cookie-fayllar va shunga o‘xshash texnologiyalar

1. Sayt o‘zining to‘g‘ri ishlashini ta’minlash, til sozlamalarini saqlash, tashriflar sonini tahlil qilish, foydalanuvchi tajribasini yaxshilash va xavfsizlikni ta’minlash uchun cookie-fayllar va shunga o‘xshash texnologiyalardan foydalanishi mumkin.
2. Cookie-fayllar jumlasiga quyidagilar kirishi mumkin:
   • Saytning faoliyat ko‘rsatishi uchun zarur bo‘lgan texnik cookie-fayllar;
   • Foydalanuvchi sozlamalarini eslab qolish imkonini beruvchi funksional cookie-fayllar;
   • tashriflar sonini baholash va Saytni yaxshilash uchun foydalaniladigan analitik cookie-fayllar;
   • marketing cookie-fayllari — agar bunday vositalar Saytga ulangan bo‘lsa, faqat Foydalanuvchining tegishli roziligi mavjud bo‘lganda.
3. Foydalanuvchi o‘z brauzeri sozlamalarida cookie-fayllardan foydalanishni cheklashi yoki o‘chirib qo‘yishi mumkin. Ayrim cookie-fayllarning o‘chirib qo‘yilishi Saytning to‘g‘ri ishlashiga ta’sir ko‘rsatishi mumkin.
4. Agar Saytda uchinchi tomon analitik yoki reklama servislaridan foydalanilsa, bunday servislar tomonidan ma’lumotlarga ishlov berish ularning o‘z maxfiylik siyosatlari bilan ham tartibga solinishi mumkin.

Foydalanuvchining huquqlari

1. Foydalanuvchi quyidagi huquqlarga ega:
   • o‘z shaxsga doir ma’lumotlariga ishlov berilishi to‘g‘risida axborot olish;
   • shaxsga doir ma’lumotlarni aniqlashtirish, o‘zgartirish yoki to‘ldirishni talab qilish;
   • shaxsga doir ma’lumotlarga ishlov berishni to‘xtatishni talab qilish;
   • to‘liq bo‘lmagan, eskirgan, noaniq, qonunga xilof ravishda olingan yoki ishlov berishning bildirilgan maqsadlari uchun zarur bo‘lmagan shaxsga doir ma’lumotlarni o‘chirish yoki yo‘q qilishni talab qilish;
   • shaxsga doir ma’lumotlarga ishlov berishga berilgan rozilikni chaqirib olish;
   • axborot va marketing xabarlarini olishga e’tiroz bildirish;
   • Operatorning harakatlari yoki harakatsizligi ustidan vakolatli organga yoki sudga shikoyat qilish;
   • O‘zbekiston Respublikasi qonunchiligida nazarda tutilgan boshqa huquqlarni amalga oshirish.
2. Foydalanuvchi o‘z huquqlarini amalga oshirish uchun info@abacus.law elektron pochta manziliga murojaat yuborishi mumkin.
3. Murojaatda F.I.Sh., aloqa ma’lumotlari, talabning mohiyati hamda Foydalanuvchini identifikatsiya qilish va tegishli shaxsga doir ma’lumotlarni topish imkonini beradigan axborotni ko‘rsatish tavsiya etiladi.
4. Agar bu shaxsga doir ma’lumotlarga g‘ayriqonuniy kirishning oldini olish uchun zarur bo‘lsa, Operator Foydalanuvchining shaxsini tasdiqlash uchun qo‘shimcha axborot so‘rashga haqli.

Rozilikni chaqirib olish

1. Foydalanuvchi info@abacus.law elektron pochta manziliga tegishli bildirishnoma yuborish orqali shaxsga doir ma’lumotlarga ishlov berishga berilgan rozilikni chaqirib olishga haqli.
2. Rozilikning chaqirib olinishi bunday chaqirib olish to‘g‘risidagi bildirishnoma olingan paytgacha amalga oshirilgan shaxsga doir ma’lumotlarga ishlov berishning qonuniyligiga ta’sir ko‘rsatmaydi.
3. Rozilikni chaqirib olish to‘g‘risidagi bildirishnoma olingandan so‘ng Operator Foydalanuvchining shaxsga doir ma’lumotlariga ishlov berishni to‘xtatadi, keyingi ishlov berish qonunchilikda ruxsat etilgan yoki talab etilgan yoxud shartnomani bajarish, Operator, mijoz yoki uchinchi shaxslarning huquqlari va qonuniy manfaatlarini himoya qilish yoki ilgari mavjud bo‘lgan munosabatlar va muloqotlar faktini tasdiqlash uchun zarur bo‘lgan hollar bundan mustasno.

Axborot va marketing xabarlari

1. Operator Foydalanuvchiga ABACUS faoliyati bilan bog‘liq axborot, tahliliy, yangiliklarga oid va boshqa materiallarni faqat Foydalanuvchining roziligi yoxud boshqa qonuniy asos mavjud bo‘lganda yuborishi mumkin.
2. Foydalanuvchi istalgan vaqtda info@abacus.law elektron pochta manziliga tegishli bildirishnoma yuborib yoxud, agar xabarda nazarda tutilgan bo‘lsa, xabarlar yuborilishidan voz kechish mexanizmidan foydalanib, bunday xabarlarni olishdan voz kechishga haqli.
3. Murojaatni ko‘rib chiqish, shartnomani bajarish, maslahatni tashkil etish, hujjatlarni yuborish yoki qonunchilik talablariga rioya etish bilan bog‘liq xizmat xabarlari marketing xabarlari hisoblanmaydi.

Shaxsga doir ma’lumotlar bazasini ro‘yxatdan o‘tkazish

1. O‘zbekiston Respublikasi qonunchiligida shaxsga doir ma’lumotlar bazasini Shaxsga doir ma’lumotlar bazalarining davlat reyestrida ro‘yxatdan o‘tkazish majburiyati nazarda tutilgan hollarda Operator tegishli talablar bajarilishini ta’minlaydi.
2. Agar tegishli shaxsga doir ma’lumotlar bazasi qonunchilikda nazarda tutilgan istisnolarga ko‘ra ro‘yxatdan o‘tkazilishi lozim bo‘lmasa, Operator bunday bazani ro‘yxatdan o‘tkazmasdan shaxsga doir ma’lumotlarga ishlov berish, ularni saqlash va himoya qilishga oid talablarga rioya etilishini ta’minlaydi.
3. Agar shaxsga doir ma’lumotlar bazasini ro‘yxatdan o‘tkazish talab etilsa, buning uchun zarur bo‘lgan ma’lumotlar o‘zgarganda Operator ularni belgilangan tartibda yangilash choralarini ko‘radi.

Javobgarlik

1. Operator shaxsga doir ma’lumotlar to‘g‘risidagi qonunchilik talablariga rioya etilishi, shuningdek o‘z nazorati doirasida ishbilarmonlik axborotining maxfiyligiga rioya etilishi uchun javobgar bo‘ladi.
2. Foydalanuvchi o‘zi taqdim etadigan shaxsga doir ma’lumotlarning ishonchliligi uchun javobgar bo‘ladi.
3. Agar Foydalanuvchi uchinchi shaxslarning shaxsga doir ma’lumotlarini yoki uchinchi shaxslarga taalluqli ishbilarmonlik axborotini taqdim etsa, u bunday ma’lumotlar va axborotni uzatish uchun zarur roziliklar, vakolatlarni olganligini yoki boshqa qonuniy asosga ega ekanligini tasdiqlaydi.
4. Agar uchinchi shaxslarning, shu jumladan tashqi saytlar, aloqa servislari, pochta servislari, xosting-provayderlar va boshqa platformalarning harakatlari Operatorning oqilona nazoratidan tashqarida bo‘lsa, Operator bunday harakatlar uchun javobgar bo‘lmaydi.

Uchinchi tomon resurslariga havolalar

1. Saytda uchinchi tomon saytlari, xaritalar, ijtimoiy tarmoqlar, messenjerlar, analitika servislari yoki boshqa tashqi resurslarga havolalar bo‘lishi mumkin.
2. Operator uchinchi tomon resurslarining mazmunini, maxfiylik siyosatini va ulardagi shaxsga doir ma’lumotlarga ishlov berish tartibini nazorat qilmaydi.
3. Tashqi havolalar orqali o‘tib, Foydalanuvchi tegishli resursning ma’lumotlarga ishlov berish shartlari bilan mustaqil ravishda tanishadi.

Siyosatni o‘zgartirish

1. Operator ushbu Siyosatni bir tomonlama tartibda o‘zgartirishga haqli.
2. Siyosatning yangi tahriri, agar unda boshqa muddat ko‘rsatilmagan bo‘lsa, Saytda joylashtirilgan paytdan e’tiboran kuchga kiradi.
3. Foydalanuvchiga Saytda Siyosatning amaldagi tahririni vaqti-vaqti bilan tekshirib turish tavsiya etiladi.

Aloqa ma’lumotlari

1. Ushbu Siyosat, shaxsga doir ma’lumotlarga ishlov berish, rozilikni chaqirib olish, ma’lumotlarni o‘zgartirish yoki o‘chirish bilan bog‘liq barcha masalalar yuzasidan Foydalanuvchi quyidagi aloqa ma’lumotlari orqali murojaat qilishi mumkin:

Manzil: O‘zbekiston Respublikasi, Toshkent shahri, Mirobod tumani, Chimkent ko‘chasi, 15/26

Telefon: +998 97 733 30 40

Elektron pochta: info@abacus.law

Sayt: abacus.law